په جرمني کې د استوګنې دايمي اجازه

هغه کسان چې د مهاجر په توګه پېژندل شوي وي او يا يې د پنا حق ترلاسه کړی وي؛ د استوګنې د دايمي اجازې ترلاسه کولو لپاره بايد لاندې شرايط پوره کړي:

• دوی بايد له جاب‌سنټر يا سوسيال څخه هېڅ يا لږ مرسته ترلاسه کړي. په دې مانا چې دوی بايد د خپل ژوند د لګښتونو ډېره برخه خپله پوره کړي. دا چې څوک له جاب‌سنټر يا سوسيال څخه د څومره مرستې ترلاسه کولو اجازه لري؛ په هر ايالت کې له بل سره توپير کوي. د ډېرو مالوماتو لپاره د خپلې سيمې اوسلنډربېهورده ادارې يا يوه مشورتي مرکز ته ورشئ.
• له دريو کالوو وروسته د جرمني ژبې د C1 سند درلودل؛ که له پينځو کالونو وروسته د اوسېدو د مودې د تمديد غوښتنه کوئ؛ A2 سند بسنه کوي.
• د ځان او کورنۍ د غړو لپاره د اوسېدو د کافي ځای درلودل بل شرط دی. د کور د مساحت اندازه هم په هر ايالت کې توپير کوي. د ډېرو مالوماتو لپاره د خپلې سيمې اوسلنډربېهورده ادارې يا يوه مشورتي مرکز ته ورشئ.
• تاسې بايد روغتيايي بيمه ولرئ.
• په برياليتوب د بلدتيا (Orientierungskurs) کورس بشپړول هم له دې شرطونو يو دی.
• بايد کومه جرمي سابقه ونه لرئ.
• لږ تر لږه د دريو يا پينځو کالو لپاره د استوګنې اجازه (د پناغوښتنې د پروسيجر د مودې په ګډون) بل لازمي شرط دی.
• ستاسې د خونديتوب د په رسميت پېژندلو لپاره دلايل بايد لا هم د توجیه وړ وي.

هغه کسان چې فرعي خونديتوب يا په ډي‍پورټ د بنديز له حقه برخمن شوي وي؛ بايد يو څه زيات شرطونه پوره کړي. د بېلګې په ډول دوی بايد له دولته هېڅ مالي مرسته ترلاسه نه کړي او لږ تر لږه د ۶۰ مياشتو لپاره يې د تقاعد بيمه (Rentenversicherung) ورکړې وي.

 دايمي استوګنې د اجازې ترلاسه کولو لپاره د بهرنيانو چارو خپلې اړونده ادارې (Ausländerbehörde) ته په ليکلې بڼه غوښتنه وړاندې کړئ. د دې کار لپاره اړوند غوښتنليک يا (Antrag auf Erteilung der Niederlassungserlaubnis) د بهرنيانو چارو د ادارې پر وېبسایټ موندلای شئ. دا غوښتنليک کښته، چاپ، ډک او لاسليک کړئ او له يوه پاسپورتي عکس او لاندې يادو شوو سندونو سره يې دې ادارې ته د پوست له لارې ولېږئ. ځينې ادارې د خپلو ادارو مخې ته هم د پوست بکسونه لري. کولای شئ هلته يې خپله هم واچوئ:

نور مل او اړين سندونه:

• د اوسني پاسپورت کاپي.
• د کار د قرارداد کاپي، د تېرو شپږو مياشتو د معاش د ترلاسه کولو سندونه او داسې يو سند چې وښيي تاسې به راتلونکې نورې شپږ مياشتې هم کار ولرئ. د کار د دوام دا سند بايد له ۱۴ ورځو ډېر زوړ نه وي. که څوک آزاد کار کوي: د ماليې د ارزونې يا تصفيې سند (Steuerbescheid) چې د مالي مشاور له لوري تيار شوی وي.
• د روغتيايي بيمي د شرکت يو تاييدليک چې وښيي تاسې هلته بيمه شوي ياست.
• د کور د کرايې د قرارداد يوه کاپي.
• د جرمني ژبې د زده‌کړې د بري‌ليک يا سرټيفیکېټ يوه کاپي.
• د جرمني د تقاعد د بيمي مالومات (په ځينو ايالتونو کې دا مالومات نه غواړي).
• که د ماشومانو پیسې (Kindergeld) يا میندو او پلرونو پیسې (Elterngeld) يا نورې ورته مرستې ترلاسه کوئ؛ د هغو اړوند سندونه.
• د اوسېدنې د ځای د ثبت سند.

په ياد مو وي چې د استوګنې د دايمي ويزې ترلاسه کول لګښتونه هم لري. کله چې د بهرنيانو چارو اداره ستاسې غوښتنليک ترلاسه کړي؛ ستاسې سره د خپلې پرېکړې په اړه اړيکه ونيسي. که کوم سند مو کم يا ناسم وي؛ ښايي د سمولو يا بشپړولو غوښتنه يې وشي.

هغه کسان چې د مهاجر يا‌ پناغوښتونکي په توګه پېژندل شوي وي او يا يې د فرعي خونديتوب يا په ډيپورټ له ملي بنديز وروسته د استوګنې دايمي اجازه ترلاسه کړې وي؛ ښايي خپل هېواد ته د تلو په صورت کې يې د پنا يا مهاجرت د خونديتوب حق او د استوګنې اجازه لغوه شي. که ستاسې د پنا يا مهاجرت حق نور د باور ونه ګڼل شي؛ د بهرنيانو د تنظيم اداره به دوې ټاکنې ولري:

 الف: دوی ښايي ستاسې د دايمي استوګنې اجازه لغوه کړي.

ب: ښايي د استوګنې دايمي اجازه مو په خپل حال پرېږدي.

•  هغه کسان چې په جرمني کې يې ډېر وخت تېر شوی وي؛ جرمني ژبه يې ښه زده وي؛ دنده ولري‌ او دولتي مرسته ترلاسه نه کړي؛ ښايي په اړه يې دوهمه ټاکنه غوره شي (د استوګن قانون ۵۲مه ماده).
• هغه کسان چې د استوګنې دايمي اجازه ولري او له جرمني بهر ۶ مياشتې تېرې کړي؛ د اصولو له مخې د استوګنې يا دايمي ژوند اجازه له لاسه ورکوي (د استوګنې قانون ۵۱مه ماده).
• که چا د خپلې استوګنې يا دايمي ژوند اجازه د ناسمو مالوماتو يا جعلي سندونو پر بنسټ ترلاسه کړې وي؛ د رښتيا مالومېدو په صورت کې به دا اجازه له لاسه ورکړي.

که څوک عامه نظم او امنيت ته ګواښ وګڼل شي؛ ښايي خپل هېواد ته ولېږل شي. په داسې حالاتو کې به د استوګنې يا دايمي ژوند اجازه هم له لاسه ورکړي. که څوک فکر کوي چې د استوګنې اجازه يې د باطلېدلو له ګواښ سره مخ ده؛ کولای شي له مشورتي مرکزونو يا کوم وکيل څخه مرسته وغواړي. د بېلګې په توګه کولای شي د پروازول له ادارې مرسته وغواړي. د دې ادارې کارکوونکي به جرمني او انګليسي ژبو خبرو کوي او په (۰۰۴۹۶۹۲۴۲۳۱۴۲۰) شمېره او (proasyl@proasyl.de) برېښناليک اړيکه ورسره نيول کېدای شي.

هغه کسان چې د مهاجر په توګه پېژندل شوي وي او يا يې د پنا حق ترلاسه کړی وي؛ د استوګنې د دايمي اجازې ترلاسه کولو لپاره بايد لاندې شرايط پوره کړي:

• دوی بايد له جاب‌سنټر يا سوسيال څخه هېڅ يا لږ مرسته ترلاسه کړي. په دې مانا چې دوی بايد د خپل ژوند د لګښتونو ډېره برخه خپله پوره کړي.
• دوی بايد په جرمني ژبه خبرې وکړای شي او لږ تر لږه د جرمني ژبې A2 سند ولري.
• د ځان او کورنۍ د غړو لپاره د اوسېدو د کافي ځای درلودل بل شرط دی. د کور د مساحت اندازه هم په هر ايالت کې توپير کوي. د ډېرو مالوماتو لپاره د خپلې سيمې اوسلنډربېهورده ادارې يا يوه مشورتي مرکز ته ورشئ.
• تاسې بايد روغتيايي بيمه ولرئ.
• په برياليتوب د بلدتيا (Orientierungskurs) کورس بشپړول هم له دې شرطونو يو دی.
• بايد کومه جرمي سابقه ونه لرئ.
• لږ تر لږه د پينځو کالو لپاره د استوګنې اجازه (د پناغوښتنې د پروسيجر د مودې په ګډون) بل لازمي شرط دی.
• ستاسې د خونديتوب د په رسميت پېژندلو لپاره دلايل بايد لا هم د توجیه وړ وي.

هغه کسان چې فرعي خونديتوب يا په ډي‍پورټ د بنديز له حقه برخمن شوي وي؛ بايد يو څه زيات شرطونه پوره کړي. د بېلګې په ډول دوی بايد له دولته هېڅ مالي مرسته ترلاسه نه کړي او لږ تر لږه د ۶۰ مياشتو لپاره يې د تقاعد بيمه (Rentenversicherung) ورکړې وي.

هغه کسان چې د ډيپورټ د ملي بنديز له مخې د استوګنې اجازه لري؛ نه شي کولای د اروپايي ټولنې د دايمي استوګنې د اجازې غوښتنه وکړي.

په ياد مو وي چې د اروپايي ټولنې د دايمي استوګنې د اجازې له ترلاسه کولو مخکې بايد د جرمني د دايمي استوګنې د اجازې غوښنته وشي. د دې کار په اړه په پورته برخو کې بشپړ مالومات ورکول شوي دي. له هغه وروسته بيا کولای شئ د اروپايي ټولنې د دايمي استوګنې د اجازې غوښتنه وکړئ.

کله چې د اروپايي ټولنې د دايمي استوګنې اجازه ترلاسه کړئ او وغواړئ په بل اروپايي هېواد کې ژوند وکړئ؛ بايد د هماغه هېواد د مهاجرت په اداره کې غوښتنه وکړئ.

د بل هېواد د استوګنې د اجازې ترلاسه کولو لپاره بايد لاندې شرطونه پوره کړئ:

• د اروپايي ټولنې د دايمي استوګنې د اجازې درلودل.
• د دولت له لوري د مالي مرستې نه ترلاسه کول.
• په هغه هېواد کې چې د اوسېدو د اجازې غوښتنه کوئ؛ د کار قرارداد يا پوهنتون د داخلې يا دې ته ورته سندونه.
• د روغتيايي بيمي درلودل.
• په اړوند کې هېواد کې د استوګنې د ثبت سند (Meldebescheinigung).

کله چې د بل هېواد د مهاجرو اداره ستاسې غوښتنه ومني؛ بايد د هغه هېواد د ګمارنې له ادارې څخه د کار اجازه هم ترلاسه کړئ.

په ياد مو وي چې: په ډنمارک، بريتانيا او آیرلنډ کې د اروپايي ټولنې اړوند لارښود نه پلی کيږي. په دې هېوادونو کې د اروپايي ټولنې د استوګنې د دايمي اجازې له مخې د اوسېدلو د اجازې غوښتنه نه شئ کولای.

هغه کسان چې د مهاجر يا‌ پناغوښتونکي په توګه پېژندل شوي وي او يا يې د فرعي خونديتوب يا په ډيپورټ له ملي بنديز وروسته د اروپايي ټولنې د استوګنې دايمي اجازه ترلاسه کړې وي؛ ښايي خپل هېواد ته د تلو په صورت کې يې د پنا يا مهاجرت د خونديتوب حق او د استوګنې اجازه لغوه شي. که ستاسې د پنا يا مهاجرت حق نور د باور ونه ګڼل شي؛ د بهرنيانو د تنظيم اداره به دوې ټاکنې ولري:

 الف: دوی ښايي ستاسې د دايمي استوګنې اجازه لغوه کړي.

ب: ښايي د استوګنې دايمي اجازه مو په خپل حال پرېږدي.

•  هغه کسان چې په جرمني يا اروپايي ټولنه کې يې ډېر وخت تېر شوی وي؛ ژبه يې ښه زده وي؛ دنده ولري‌ او دولتي مرسته ترلاسه نه کړي؛ ښايي په اړه يې دوهمه ټاکنه غوره شي (د استوګن قانون ۵۲مه ماده).
• که چا د خپلې استوګنې يا دايمي ژوند اجازه د ناسمو مالوماتو يا جعلي سندونو پر بنسټ ترلاسه کړې وي؛ د رښتيا مالومېدو په صورت کې به دا اجازه له لاسه ورکړي.
• که څوک عامه نظم او امنيت ته ګواښ وګڼل شي؛ ښايي خپل هېواد ته ولېږل شي. په داسې حالاتو کې به د استوګنې يا دايمي ژوند اجازه هم له لاسه ورکړي.
• هغه کسان چې له اروپايي ټولنې (يا په ډنمارک، آيرلنډ او بريتانيا کې ) د باندې له ۱۲ مياشتو زيات ژوند وکړي؛ د اصولو له مخې د اروپايي ټولنې د دايمي استوګنې اجازه له لاسه ورکوي (د استوګنې قانون ۵۱مه ماده).
• هغه کسان چې د اروپايي ټولنې د استوګنې دايمي اجازه ولري او له جرمني بهر ۶ مياشتې تېرې کړي؛ د اصولو له مخې د استوګنې يا دايمي ژوند اجازه له لاسه ورکوي (د استوګنې قانون ۵۱مه ماده).
• که څوک له کوم بل اروپايي هېواد څخه د اوږدمهاله استوګنې اجازه ترلاسه کړي؛ د اروپايي ټولنې د استوګنې اجازه به له لاسه ورکړي.